काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले उपसभामुखबारे कुनै दलसँग पनि छलफल नभएको जिकिर गरेका छन् । शुक्रबार संसद भवन सिंहदरबारमा सञ्चारकर्मीसँग कुरा गर्दै रविले सभामुखको निर्वाचनपछि विगतको अभ्यास, संविधानलाई हेरेर निर्णयमा पुग्ने स्पष्ट पारे ।‘पहिले सभामुखको काम सकौँ, त्यसपछि उपसभामुखबारे छलफल गरौँला । उपसभामुखबारे कुनै दलसँग पनि छलफल भएको छैन । कयौँ कुरा संविधानले भनेको छ । कयौँ कुरा व्यवहारिक रूपले हुनुपर्छ । विगतमा त्यस्ता अभ्यास पनि भएका छन् । भएका अभ्यास र संविधान हेरेर हामी निर्णयमा पुग्छौँ’, उनले भने ।