काठमाडौं। १२ वर्षदेखि नेपाली कृषि, स्थानीय उत्पादन र कृषकसँग सहकार्य गर्दै आएको पैचो पसल अब पैचो पसल लिमिटेडका रूपमा पब्लिक लिमिटेड कम्पनीमा रूपान्तरण भएको छ। कम्पनीले पुँजी विस्तार, सुशासन सुदृढीकरण, आधुनिक प्रविधिमा लगानी तथा राष्ट्रिय–अन्तर्राष्ट्रिय बजार विस्तारलाई प्राथमिकता दिने जनाएको छ।
प्रबन्ध निर्देशक ध्रुवराज न्यौपानेले यसलाई नेपाली कृषि उद्यमको नयाँ अध्याय भएको बताउँदै सर्वसाधारणलाई पनि कम्पनीको यात्रामा सहभागी गराउने लक्ष्य रहेको बताए। कम्पनीको आईपीओ निष्कासनको तयारी अन्तिम चरणमा पुगेको छ भने बिक्री व्यवस्थापकका रूपमा एनआईसी एशिया क्यापिटल नियुक्त भइसकेको छ।
हाल पैचोले करिब १०० भन्दा बढी कृषि तथा खाद्य उत्पादन बजारमा उपलब्ध गराइरहेको छ। आगामी दिनमा कृषकसँगको सहकार्य विस्तार, कृषि प्रशोधन उद्योगमा थप लगानी, ताजा तरकारी बिक्री सञ्जाल विस्तार तथा स्वदेशी उत्पादनलाई अन्तर्राष्ट्रिय बजारमा प्रतिस्पर्धी नेपाली ब्रान्डका रूपमा स्थापित गर्ने रणनीति कम्पनीले अघि सारेको छ।

संस्थागत विकासको नयाँ अध्याय

पब्लिक लिमिटेडमा रूपान्तरणसँगै कम्पनीले आफ्नो पुँजी आधार विस्तार, संस्थागत सुशासन सुदृढीकरण, आधुनिक प्रविधिमा लगानी, उत्पादन क्षमता अभिवृद्धि तथा राष्ट्रिय र अन्तर्राष्ट्रिय बजार विस्तारलाई नयाँ प्राथमिकताका रूपमा अघि बढाउने जनाएको छ। पैचो पसल लिमिटेडका प्रबन्ध निर्देशक ध्रुवराज न्यौपानेले कम्पनीको यो रूपान्तरणलाई केवल कानुनी संरचना परिवर्तनका रूपमा नभई नेपाली कृषि उद्यमको भविष्य निर्माण गर्ने ऐतिहासिक उपलब्धिका रूपमा व्याख्या गरे।

उनले भने, ‘पैचो एउटा व्यवसाय मात्र होइन, यो लाखौं किसानको सपना, उपभोक्ताको विश्वास र स्वदेशी उत्पादनप्रतिको हाम्रो प्रतिबद्धताको साझा अभियान हो। पब्लिक लिमिटेडमा रूपान्तरणसँगै अब यस यात्रामा सर्वसाधारण, लगानीकर्ता र सम्पूर्ण नेपाली समुदायलाई सहयात्री बनाउने हाम्रो लक्ष्य छ।’ उनका अनुसार पैचोको आगामी रणनीति नेपाली कृषि उत्पादनलाई अझ प्रतिस्पर्धी, गुणस्तरीय र विश्व बजारसम्म पुर्याउने दिशामा केन्द्रित हुनेछ।

आईपीओ तयारी अन्तिम चरणमा

कम्पनीले प्रारम्भिक सार्वजनिक निष्कासन (आईपीओ) सम्बन्धी तयारी समेत अन्तिम चरणमा पुगेको जानकारी दिएको छ। आईपीओ निष्कासन तथा बिक्री व्यवस्थापकका रूपमा एनआईसी एशिया क्यापिटल लिमिटेड नियुक्त भइसकेको छ। आवश्यक नियामकीय प्रक्रिया पूरा भएपछि कम्पनीले सर्वसाधारणका लागि शेयर निष्कासन गर्ने जनाएको छ।

स्थानीय उत्पादनलाई राष्ट्रिय ब्रान्ड बनाउने अभियान

पैचोले विशेषगरी हिमाली तथा पहाडी क्षेत्रका कृषकसँग प्रत्यक्ष सहकार्य गर्दै ताजा कृषि उत्पादनलाई आधुनिक प्रशोधनमार्फत बजारयोग्य बनाउँदै आएको छ।

हाल कम्पनीले केचप, जाम, विभिन्न प्रकारका अचार, चुक, छोप, आँटो, कोदोको पिठो, सिन्की, मह लगायत करिब १०० भन्दा बढी कृषि तथा खाद्य उत्पादन बजारमा उपलब्ध गराइरहेको छ। यी उत्पादनहरू नेपालभरका आधुनिक खुद्रा सञ्जालमार्फत बिक्री भइरहेका छन् भने अन्तर्राष्ट्रिय बजारमा समेत आफ्नो उपस्थिति विस्तार गर्दै गएका छन्।

कृषकसँगै समृद्धिको यात्रा

‘किसान समृद्ध भए मात्रै कृषि समृद्ध हुन्छ, र कृषि समृद्ध भए मात्रै राष्ट्रको अर्थतन्त्र दिगो रूपमा सुदृढ बन्न सक्छ’ भन्ने विश्वासका साथ पैचो पसल लिमिटेडले आगामी वर्षमा लाखौं कृषकसँगको सहकार्यलाई थप विस्तार गर्ने रणनीति लिएको जनाएको छ।

प्रबन्ध निर्देशक न्यौपानेका अनुसार छरिएर रहेका कृषि उपज संकलन केन्द्रलाई थप विस्तार, आधुनिकीकरण र व्यवस्थित गरिनेछ। यसबाट कृषकले उत्पादन गरेको ताजा कृषि उपजलाई सहज रूपमा बजारसम्म पु¥याउने आधार तयार हुनेछ।

कम्पनीले ‘ताजा तरकारी बिक्री भण्डार’को सञ्जाल विस्तार गर्दै ग्रामिण कृषि उपजको प्रत्यक्ष बजारीकरणलाई सुदृढ बनाउन ब्राण्डिङ गर्ने योजना अघि सारेको छ। त्यससँगै कृषि प्रशोधन उद्योगमा थप लगानी, रोजगारी सिर्जना, स्थानीय उत्पादनको मूल्य अभिवृद्धि तथा स्वदेशी कृषि उत्पादनलाई अन्तर्राष्ट्रिय बजारमा प्रतिस्पर्धी नेपाली ब्रान्डका रूपमा स्थापित गर्ने दीर्घकालीन रणनीति अवलम्बन गरिएको कम्पनीले जनाएको छ।

पब्लिक लिमिटेड कम्पनीका रूपमा रूपान्तरणसँगै पैचो पसल लिमिटेडले नेपालको कृषि अर्थतन्त्रलाई समेत नयाँ उचाइमा पु¥याउने विश्वास लिएको छ ।