काठमाडौं । साताको तेस्रो कारोबार दिन मंगलबार पनि नेपाल स्टक एक्सचेञ्ज(नेप्से) परिसूचक बढेर बन्द भएको छ । अघिल्लो कारोबार दिन सोमबार सामान्य अंकले बढेको बजारले मंगलबार पनि सोही लयलाई निरन्तरता दिएको हो ।
यस दिन नेप्से परिसूचक २१.६२ अंकले बढेर २६३८.६० विन्दुमा पुगेको छ। त्यस्तै, सेन्सेटिभ इण्डेक्स २.३१ अंकले वृद्धि भएको छ भने फ्लोट इण्डेक्स १.४० अंक र सेन्सेटिभ फ्लोट इण्डेक्स ०.९० अंकले उकालो लागेको छ ।

परिसूचक बढे पनि कारोबार रकम भने घटेको छ। सोमबार ५ अर्ब १३ करोड रुपैयाँ बराबरको शेयर किनबेच भएको बजारमा मंगलबार ३२८ स्टकको ४९ हजार ९३ पटकको कारोबारमा ४ अर्ब २३ करोड २४ लाख ७ हजार रुपैयाँ बराबरको ९३ लाख ६४ हजार कित्ता शेयर खरिदबिक्री भएको छ । मंगलबार पनि सालपा विकास बैंकको शेयर सकारात्मक सर्किट लेभलमा कारोबार भएको छ। बैंकको शेयरमूल्य ४३ रुपैयाँ ९० पैसा बढेर ४८३ रुपैयाँ १० पैसामा अन्तिम कारोबार भएको छ।

त्यस्तै, रिलायन्स स्पिनिङ मिल्स र हिमालयन पावर पार्टनरको शेयरमूल्य ९ प्रतिशतभन्दा बढीले बढेको छ भने सागर डिष्टिलरीको शेयरमूल्य करिब ९ प्रतिशतले उकालो लागेको छ । यस दिन घटेका स्टकहरुको मूल्य गिरावट दर भने ४ प्रतिशतभन्दा कम रहेको छ। कारोबार रकमका आधारमा एसवाई प्यानल नेपाल शीर्ष स्थानमा रहेको छ। सो कम्पनीको ३७ करोड ७२ लाख रुपैयाँ बराबरको शेयर कारोबार भएको छ ।
त्यस्तै, आँखुखोला जलविद्युत कम्पनीको साढे २४ करोड रुपैयाँभन्दा बढीको शेयर किनबेच भएको छ भने राधी विद्युत कम्पनीको कारोबार रकम १६ करोड रुपैयाँ नाघेको छ।
यस दिन १३ वटै उपसमूहको परिसूचक बढेको छ। जसमध्ये होटल तथा पर्यटन उपसमूह सर्वाधिक २.०२ प्रतिशतले बढेको छ । त्यस्तै, विकास बैंक, जलविद्युत, उत्पादन तथा प्रशोधन र व्यापार उपसमूहको परिसूचक पनि १ प्रतिशतभन्दा बढीले उकालो लागेको छ ।