सुर्खेत । कर्णाली प्रदेश सरकारमा सहभागी हुने तीन मन्त्रीको नाम टुंग्याउन नसकेपछि नेपाली कम्युनिस्ट पार्टी (नेकपा)ले सात जना आकांक्षीको नाम पार्टी केन्द्रमा पठाएको छ । मन्त्री छनोटको जिम्मेवारी अब नेकपाका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालले लिने भएका छन् ।
तीन मन्त्रालयका लागि सोमबार बिहानसम्म सहमति जुट्न नसकेपछि सात जना आकांक्षीको नाम केन्द्रमा पठाइएको नेकपा कर्णालीका प्रदेश इन्चार्ज चन्द्रबहादुर शाहीले जानकारी दिए । उनका अनुसार केन्द्रबाट नाम टुंगो लागेपछि मात्रै मन्त्री नियुक्तिको प्रक्रिया अघि बढ्नेछ ।

यसअघि सोमबार बिहान ११ बजे नेकपाबाट चयन हुने तीन मन्त्रीलाई पद तथा गोपनीयताको शपथ गराउने तयारी थियो । प्रदेश प्रमुखको कार्यालयले समेत शपथका लागि समय तय गरिसकेको थियो । तर अन्तिम समयमा मन्त्रीको नाम सिफारिस हुन नसकेपछि मुख्यमन्त्री मंगलबहादुर शाहीले शपथ कार्यक्रम स्थगित गर्न आग्रह गरेका थिए ।
नेकपाबाट विन्दमान विष्ट, मिलन खड्का र जुम्कित लामाको नाम मन्त्रीका रूपमा चर्चामा आए पनि आकांक्षीको संख्या बढेपछि निर्णय हुन नसकेको हो । मन्त्री छनोटको विषयमा साबिक माओवादी र साबिक नेकपा एकीकृत समाजवादी धारबीच देखिएको मतभेदसमेत सतहमा आएको छ ।

नेकपा र नेकपा एमालेबीच भएको सत्ता साझेदारीअनुसार कर्णालीमा नेकपाले मुख्यमन्त्रीसहित तीन मन्त्रालय पाएको छ । नेकपाको भागमा भौतिक पूर्वाधार तथा सहरी विकास, उद्योग–पर्यटन–वन तथा वातावरण र भूमि व्यवस्था, कृषि तथा सहकारी मन्त्रालय छन् । एमालेबाट भने तीन मन्त्री यसअघि नै नियुक्त भइसकेका छन् ।
मन्त्री छनोटमा भएको ढिलाइका कारण मुख्यमन्त्री मंगलबहादुर शाही नेतृत्वको कर्णाली सरकार गठन भएको करिब एक महिना पुग्न लाग्दासमेत पूर्ण रूपमा सञ्चालनमा आउन सकेको छैन । सरकारका नियमित कामकाजसँगै बजेट कार्यान्वयनमा समेत यसको असर पर्न सक्ने भन्दै सरकारको आलोचना भइरहेको छ ।