काठमाडौं । चीनको हुनान प्रान्तस्थित छाङ्सामा गत अप्रिल १४ देखि १९ सम्म आयोजित ‘नेपाल एभरेस्ट फिल्म फेस्टिभल’ (नेपाली चलचित्र सप्ताह) मा उत्कृष्ट ठहरिएका नेपाली चलचित्र, कलाकार तथा प्राविधिकलाई काठमाडौंमा आयोजित विशेष समारोहमा नगद पुरस्कारसहित सम्मान गरिएको छ।
नेपाल चलचित्र विकास बोर्डको सहकार्यमा सम्पन्न कार्यक्रममा चीनबाट आएको आठ सदस्यीय प्रतिनिधिमण्डल, नेपाली चलचित्र क्षेत्रका कलाकार, निर्देशक, निर्माता, प्राविधिक तथा सञ्चारकर्मीहरूको उल्लेखनीय उपस्थिति रहेको थियो।

आयोजकका अनुसार चीनका चलचित्र विज्ञ, प्राध्यापक तथा फिल्म कलेजका विद्यार्थीहरूको टोलीले डा. सिमोन किउ (Dr. Simmon Qiu) को संयोजकत्वमा विभिन्न विधाका उत्कृष्ट स्रष्टाको मूल्याङ्कन गरेको थियो।
उत्कृष्ट चलचित्रको अवार्ड ‘एन्जिला’ ले जित्दै ४ हजार अमेरिकी डलर नगद पुरस्कार प्राप्त गर्यो। ‘तेल भिसा’ का निर्देशक शंकर घिमिरे उत्कृष्ट निर्देशक घोषित हुँदै २ हजार अमेरिकी डलर पुरस्कारबाट सम्मानित भए।

अभिनयतर्फ ‘छक्का पञ्जा’ का दीपकराज गिरी उत्कृष्ट अभिनेता तथा ‘कबड्डी ४’ की मिरुना मगर उत्कृष्ट अभिनेत्री घोषित भए। दुवैले जनही १ हजार अमेरिकी डलर पुरस्कार प्राप्त गरे।
प्राविधिकतर्फ ‘महाजात्रा’ का पुरुषोत्तम प्रधान उत्कृष्ट छायाकार घोषित भए भने ‘हस्टेल ३’ का बनिष शाह र विकास दाहाल उत्कृष्ट सम्पादन विधामा सम्मानित भए। दुवै विधाका विजेतालाई पनि जनही १ हजार अमेरिकी डलर प्रदान गरिएको थियो।

समारोहमा नेपाल–चीन चलचित्र सहकार्यलाई सुदृढ बनाउन योगदान पुर्‍याएका विभिन्न व्यक्तित्वलाई विशेष सम्मान गरिएको थियो। फेस्टिभलका मुख्य प्रायोजक तथा गुवाङझाउ सिगुआङयुन टेक्नोलोजीका अध्यक्ष लि हान (Li Han) सहित नेपाल–चीनबीच चलचित्रमार्फत सांस्कृतिक सम्बन्ध विस्तारमा योगदान पुर्‍याएका चिनियाँ प्रतिनिधिमण्डलका सदस्यहरूलाई सम्मान गरिएको आयोजकले जनाएको छ।
चिनियाँ टोलीले नेपाल चलचित्र विकास बोर्डका अध्यक्ष दिनेश डिसी र नेपालतर्फका फेस्टिभल अध्यक्ष करुण थापा लाई नेपाल–चीन सांस्कृतिक सहकार्य विस्तारमा पुर्‍याएको योगदानको कदरस्वरूप विशेष सम्मान अर्पण गरेको थियो।

कार्यक्रमलाई सम्बोधन गर्दै फेस्टिभलका संस्थापक अध्यक्ष लि हङ्सु (Li Hongshu) ले कला र सिनेमाको कुनै भौगोलिक सीमा नहुने उल्लेख गर्दै नेपाल र चीनबीच चलचित्रमार्फत सांस्कृतिक आदानप्रदानलाई अझ सशक्त बनाउने प्रतिबद्धता व्यक्त गरे।
नेपालतर्फका फेस्टिभल अध्यक्ष करुण थापा ले यस पहलले नेपाली चलचित्रलाई चिनियाँ सिनेमा हल तथा ओटीटी प्लेटफर्मसम्म पुर्‍याउने ऐतिहासिक अवसर सिर्जना गरेको बताए।

नेपाल चलचित्र विकास बोर्डका अध्यक्ष दिनेश डिसी ले चीनमा नेपाली चलचित्रप्रति देखिएको सकारात्मक उत्साहले भविष्यमा चिनियाँ बजारमा नेपाली चलचित्रको व्यावसायिक सम्भावना अझ विस्तार हुने विश्वास व्यक्त गरे।
समारोहका प्रमुख अतिथि वरिष्ठ अभिनेता हरिहर शर्मा को आह्वानमा उपस्थित सम्पूर्ण चलचित्रकर्मीले उठेर चिनियाँ प्रतिनिधिमण्डललाई ‘स्ट्यान्डिङ ओभेसन’ दिँदै सम्मान व्यक्त गरेका थिए।

यस अवसरमा चिनियाँ लगानीकर्ता तथा आयोजकहरूले नेपाली चलचित्रमा सह–उत्पादन (Co-production) र लगानी गर्ने गम्भीर रुचि व्यक्त गरेका छन्। साथै, कृत्रिम बुद्धिमत्ता (AI) प्रविधिमा आधारित नेपाली चलचित्रलाई चीनका प्रमुख ओटीटी प्लेटफर्ममार्फत प्रदर्शन गर्ने विषयमा समेत सहकार्य अघि बढाउने सहमति भएको आयोजकले जनाएको छ।
आयोजकका अनुसार ‘नेपाल एभरेस्ट फिल्म फेस्टिभल’ आगामी संस्करणहरूमा अझ विस्तारित स्वरूपमा आयोजना गरिनेछ। पुरस्कार राशि वृद्धि गर्नुका साथै अन्तर्राष्ट्रिय सहभागिता समेत थप विस्तार गर्ने योजना रहेको छ।