रुपन्देहीमा यौनसम्पर्क गर्न नदिएको रिसमा एक जनाले आफ्नै श्रीमतीको हत्या गरेका छन् । रुपन्देहीको सियारी गाउँपालिका वडा नम्बर ३ हर्नैयाकी कुश्मा बानियाँको उनकै श्रीमान गनपतले यौन सम्पर्क गर्न नदिएको भन्दै हत्या गरेको प्रहरीको प्रारम्भिक अनुसन्धानले देखाएको छ ।

श्रीमतीको हत्या अभियोगमा ६६ वर्षीय गनपतलाई प्रहरीले बिहीबार बिहान पक्राउ गरेको छ । ५५ वर्षीय कुश्मा बिहीबार बिहान सवा ३ बजे आफ्नै घरको कोठामा मृत अवस्थामा फेला परेकी थिइन ्। घटना थाहा पाउनेवित्तिकै घटनास्थल पुगेको प्रहरीले श्रीमान बानियाँलाई पक्राउ गरेको हो । घरको कोठाभित्र खाटमा मृत भेटिएकी कुश्माको घाँटीमा दाग भेटिएपछि हत्या आशंकामा गनपतलाई पक्राउ गरिएको जिल्ला प्रहरी कार्यालय रुपन्देहीका प्रवक्ता प्रहरी उपरीक्षक सत्यनारायण थापाले बताउनु भयो ।

प्रहरी अनुसन्धानले देखाए अनुसार छोराबुहारी र नातिनातिना समेत एउटै परिवारमा बस्दै आएका गनपतले यसअघि पनि यौन सम्पर्क गर्न नदिएको भन्दै श्रीमती कुश्मालाई कुटपिट गर्दै आएको बुझिएको छ । बुधबार साँझ पनि खानपिन गरी राति ९ बजेतिर सुत्न गएकी कुस्मालाई यौन सम्पर्क गर्न नदिएको भन्दै आफैंले घाँटी थिचेर हत्या गरेको गनपतले प्रहरीसामु बयान दिएको प्रहरी प्रवक्ता थापाले जानकारी दिनु भयो । श्रीमान–श्रीमतीबीच यसअघि पनि यौन सम्पर्कको विषयमा झै–झगडा हुने गरेको रहेछ, बुधबार राति पनि गनपतले जबरजस्ती यौन सम्पर्क गर्न खोज्दा श्रीमतीले नमानेपछि रिसको झोंकमा घाँटी थिचेर हत्या गरेको आरोपितको बयान र प्रारम्भिक अनुसन्धानले देखाएको छ।