काठमाडौं । गायिका विमला परियारको स्वरमा रहेको गीत ‘फाटेको मन’ सार्वजनिक भएको छ । सन्तोष प्रगाढको शब्द, संगीत तथा संगीत संयोजन रहेको गीत ‘फाटेको मन’ गायिका विमला परियारकै अफिसियल यूट्युब च्यानलबाट सार्वजनिक गरिएको हो ।
‘फाटेको मन’ गीतको भिडियोमा गायिका विमला परियारकै फिचरिङ रहेको छ । कृष्णराज भण्डारीको निर्देशन रहेको ‘फाटेको मन’ गीतको भिडियोमा श्रद्धा दियालीको सहायक निर्देशन रहेको छ । अमित विकको छायाँकन रहेको यस गीतको भिडियोलाई राजेश अनुरागीले सम्पादन गरेका छन् ।
मायाप्रेमभित्रको मिलन र बिछोडको भावलाई ‘फाटेको मन’ गीतभित्र समावेश गरिएको छ । गायिका विमला परियार गीतसंगीत क्षेत्रमा एकदशक भन्दा लामो समयदेखि क्रियाशील रहँदै आएकी छन् । संगीतमा नै साधना गरिरहेकी गायिका परियारको स्वरमा यो मन दुखेको लोकगीत पनि सार्वजनिक छ । परियारका एक दर्जनभन्दा बढी गीतहरु बजारमा आइसकेका छन् ।
‘फाटेको मन’ गीतलाई उनले आफ्ना श्रीमान विक्रम परियारप्रति समर्पित गरेकी छन् । स्थानीय चुनावको सिलसिलामा गृहजिल्ला तनहुँमा जाँदा बैशाख ३१ गतेकै दिन स्व.विक्रम परियारलाई ढुंगाले हानेर हत्या गरिएका थियो । श्रीमान गुमाउनु परेको पीडालाई गीतमा समर्पित गर्दै उनले बैशाख ३१ गतेका दिन गीत सार्वजनिक गरेकी हुन् ।
