विराटनगर । नेपाली कांग्रेसको १५औँ महाधिवेशनअन्तर्गत मोरङ क्षेत्र नम्बर ६ मा भइरहेको अधिवेशनका क्रममा बुधबार झडप भएको छ। झडपका कारण मनोनयन दर्ता प्रक्रिया प्रभावित भएको छ।

सुन्दरहरैँचा–४ स्थित सिक्देल बन्धु समन्वय प्रतिष्ठानमा मनोनयन दर्ताका क्रममा विवाद भएपछि झडप भएको हो। झडपमा केही व्यक्ति घाइते भएका छन्।
जिल्ला प्रहरी कार्यालय मोरङका सूचना अधिकारी प्रहरी नायब उपरीक्षक मकेन्द्रकुमार मिश्रका अनुसार घाइतेलाई उपचारका लागि विराटनगरस्थित नोबेल टिचिङ अस्पताल ल्याइएको छ।

प्रतिनिधिको नामावलीमा एक महिलाको नाम समावेश नभएको विषयबाट विवाद सुरु भएको बताइएको छ। माइन्युट लेख्ने क्रममा ती महिलाले आफ्नो नाम नपरेको विषयमा कुरा राखेपछि केही व्यक्तिहरू आएर तोडफोड गरेको बताइएको छ।

झडपका क्रममा क्षेत्रीय सभापतिका उम्मेदवार चुमनारायण तबदार, चेतराज रेग्मी र समुन्द्र पोखरेललगायतलाई कुटपिट गरिएको बताइएको छ। घटनाका क्रममा कुर्सीसमेत तोडफोड भएको छ।
झडपपछि निर्वाचन प्रक्रिया रोकिएको छ। निर्धारित मनोनयन दर्ता प्रक्रिया प्रभावित भएपछि अब मनोनयन कहिले र कसरी अघि बढाउने भन्ने विषयमा अन्योल देखिएको छ।