काठमाडौं । प्रतिनिधिसभाले चालु अधिवेशनअन्तर्गतको संसदीय क्यालेन्डर सार्वजनिक गरेको छ। सार्वजनिक क्यालेन्डरअनुसार भदौ १५ गतेसम्म प्रतिनिधिसभाका ६ वटा बैठक बस्नेछन्।
संसद् सचिवालयले सार्वजनिक गरेको कार्यतालिकाअनुसार बैठकहरूमा विभिन्न विधेयकमाथिको छलफल, समितिका प्रतिवेदन पेश, आवश्यक कानुनी प्रस्ताव तथा समसामयिक विषयमा संसद्को नियमित कार्यसूची अघि बढाइनेछ।
यसपटकको क्यालेन्डरमा प्रधानमन्त्रीसँगको प्रत्यक्ष प्रश्नोत्तर कार्यक्रम भने समावेश गरिएको छैन। सामान्यतया सांसदहरूले प्रधानमन्त्रीसँग समसामयिक विषयमा प्रश्न राख्ने व्यवस्था रहे पनि सार्वजनिक कार्यतालिकामा उक्त कार्यक्रम नपरेको हो।
संसदीय क्यालेन्डरअनुसार बैठकहरू तोकिएको मितिमा नियमित रूपमा सञ्चालन हुनेछन् भने आवश्यकताअनुसार कार्यसूचीमा थप वा संशोधन हुन सक्ने संसद् सचिवालयले जनाएको छ।
यसबीच, सरकारले विभिन्न विधेयक अघि बढाउने तयारी गरिरहेको र प्रमुख राजनीतिक दलहरूबीच समसामयिक राजनीतिक तथा कानुनी विषयमा छलफल जारी रहेकाले आगामी बैठकहरूलाई अर्थपूर्ण रूपमा हेरिएको छ।
